小任務變大經歷

Week 6，Monday

        話說上星期四筆者煩惱要挑戰什麼mission既時候，在mission list中出現了一個好吸引既任務——「捐血」。於是，筆者即刻去摷番張捐血卡睇，原來對上一次捐血已經係上年8月既事，即係話我其實miss左一次救人既機會，按照紅十字會既規定(兩次捐血要相隔3個月)，筆者可以執行呢次任務。星期五放學，五點幾去到旺角銀城捐血站action，一如以往填表→拎飛排隊→轄對資料同量體溫，不過，呢次既方式有少少奇怪，我答個姑娘話一點食過 lunch，佢竟然叫我不如落樓食個飯先捐，以前都係問有無食早餐之類既問題，最後，她建議我都係先食D餅乾再驗血，我唯有接受。

       如是者，食完一包餅之後，我先去「篤手指」驗血，跟住坐定定等安排座位。等候期間，有坐前面既校服小朋友不斷對友人話「好緊張啊」什麼的，或者，好多人都將捐血當做一個挑戰，甚至係攝時間等食野既事(6、7點的旺角的緣故吧)，然而，筆者吾會當呢種事好玩，今次既「任務」正好提醒自己要盡番做定期捐血者既責任。

左上角的字“食餅”

        終於有位了，一向係左手，今次不例外，鄰座係位校服同學，可能係第一次吧，佢既情況不太順利，姑娘要不停安慰佢同「較」支針位。我就諗起上次捐血既一件趣事，話說鄰座果位健談太太見姑娘同我對資料，就不斷大聲叫我「吾洗驚架，無事架」、「好快就完架啦」~姑娘笑住幫我回應了：「佢捐過好多次架啦，有經驗架啦」。所以，筆者我既心情好輕鬆，只係拮入肉果一針仍然係甘有「感覺」。

        7分鐘過左，450ml既血包填滿晒，姑娘跟住拔針，當筆者以為第11次捐血又可以功成之際，我全身好似麻痹左……

      「聽到我講野嗎？」我認到是姑娘把聲。個刻我就意識到自己頭先昏迷左，靠聽覺我知道有好多人圍係我隔離，不過我無氣力睜開眼，而且全身無晒力。「聽到。」我只能夠柔弱咁回答，之後就feel到被人除眼鏡，拉走個枕頭，「較」平張凳俾我訓平。「你而家覺得點？」姑娘再問，「頭有少少暈。」我仍然係合埋眼好細聲答佢。「你訓低休息下先。」姑娘講完，一包我估計係冰袋既物體就放係我額頭上，之後又係半昏迷既狀態，聽到人聲，但就無力郁。講真，個時筆者吾係靠咩求生意志，而係我實在吾想「出事」要入醫院，因為好多進度會受阻，同埋我幻想到被人用擔架床抬住落西洋菜街既情景個下已經夠我撐住了。

        訓左一陣，D知覺慢慢恢复了，姑娘幫我量血壓個陣就同我講話係D血一時去吾切個腦，同埋個肚空喎。我突然諗番起體檢姑娘叫我食飯、食餅，驗血先生提我食餅，拮針姑娘問我食左餅未……吾通呢D就叫警示？

        筆者最後都安然無恙，多謝各位既關心。筆者想提醒有心捐血既朋友記得要係捐血前4個鐘「食野」，「食左」係吾夠既，要「食飽」。抱歉打太多字了。

以下分享筆者在急救課程學到的有關知識：

昏厥——是因為腦部血液供應突然減少而起的短暫人事不省，例如蹲下過久突然站起而造成的神志不清，病況通常可以很快復原。此外，過度疲勞、情緒激動、驚恐、疼痛、饑餓都可以引致昏厥。

而人事不省就可按照傷病者的反應程度分為下列等級：

1. A — alert：完全清醒。眼睛開合自如，能正常地回答問題，各種反應正常。

2. V — verbal：傷病者對聲音有反應。 (我……)

3. P — pain：傷病者對聲音無反應，對痛楚有反應。

4. U — unresponsive：傷病者對任何刺激都無反應，眼睛合上。

注：部份資訊取自香港聖約翰救護機構出版的《急救證書課程手冊》