除了餃子和芝士餅以外……

Week 9 Mission ：整野食

講到整野食，同學都話我好在行。

我識整餃子、餃子、餃子同餃子……

仲有藍莓芝士凍餅、士多啤梨芝士凍餅、芒果芝士凍餅！

大家都俾我呃左！其實我黎黎去去都係識整兩樣野！真失禮！

因此，為保自己既聲譽，決定學整新野食！

噔噔噔噔……就係士多啤梨乳酪慕斯杯啦！

材料有：

1. 士多啤梨茸

2. 原味乳酪

3. 淡忌廉

4. 檸檬汁

5. 砂糖

6. 魚膠片

step 1：
魚膠片放係凍水浸軟備用。

step2：
將淡忌廉打起……

忌廉好難打得起！

開始成形啦！

                                打到好似上圖咁既狀態就差唔多啦！

step3：
將糖、檸檬汁同士多啤梨茸撈埋，再瀝乾魚膠片既水份，放埋落去，坐熱水攪溶。

step 4：

淡忌廉倒埋落去士多啤梨漿度，再加埋Ｄ淡忌廉落去，打勻。


step 5：
倒落杯度，放落雪櫃度雪就食得啦！
超簡單，又好味！

唔知大家有無去過港台呢個網址呢？

http://www.rthk.org.hk/elearning/dessert/cake.htm

入面既甜品種類唔算太多，但每樣甜品除左有食譜之外，

仲有埋短片，真人示範教你點整。

對於新手黎講，唔肯定D步驟係點，睇短片就實在好多啦！

可以係屋企一路睇住片，慢慢跟佢D 步驟去做。

跟唔切，又可以按暫停，翻睇翻睇再翻睇都得！

超級方便~

挑戰俄羅斯方塊100級

Mission Possible：挑戰俄羅斯方塊100級

相信有留意過我地個blog既讀者，對於挑戰俄羅斯方塊既mission一點都唔陌生。話說之前子母奶玩Tetris Battle已玩到100既 神級地位，高大全受子母奶既啟發都要挑戰100級方塊！！

俄羅斯方塊既考速度，又考對策，真係一唔留神就會輸到崩潰。話說係年初既時候高大全既俄羅斯方塊等級仍然都係三十幾，一時升一時跌，苦無對策……咁點算好呢？呢個時候高大全發現……

Set Map原來比無 Map更好玩同易玩！

Set Map既款式有好多，如下圖等等
 
Set Map既玩法，一開始講求「拆積木」。只要你拆得快，一開始就已經可以送個ko比對手。之後就係快快儲積木，高大全通常會空兩行比自己，以便敵人來襲時可以還擊。以下就係高大全玩到95等級既玩法。

今次挑戰100級既任務可謂非常艱難，隨時比對手打落谷底。Just like ......

→

由96級跌落95級既感覺太難受  ，睇下一星期後既高大全能唔能夠挑戰成功先！

背地鐵站名稱

week 10 wednesday
本來是有一個好想今日完成的mission，但係有D野唔記得買，所以做唔到......><
唯有睇返精選mission，最後決定背地鐵站名，唔好睇香港咁細，原來長長短短都有10條線，而今日我即場背的是自己上學放學最常乘踏的港島線和荃灣線！


首先俾大家睇睇香港地鐵線全貌：

大家落足耳力聽我背啦！

感想：
用左電話錄左N次，牌子包括LG、samsung、Nokia、sonyericsson......
但係d程式轉激都轉唔到，最後要出動錄音筆.......前前後後用左差唔多一個鐘，人都癲呀！！！


P.s:部分圖片取自網絡

讀書周

week 10 tuesday
這個星期的想做的mission只得一個：3月完結前看完一本書。
至於那本是什麼書，還未想好。事關，決定這本是什麼書的要素，是當代文學的論文題目。
筆者一直在苦惱，到底做劉以鬯的《酒徒》還是陳慧的短篇小說集，或是長篇小說《拾香紀》。
意識流寫法的《酒徒》一直以來給我很深印象，擁有它已久，不過久久未能讀完。因為讀意識流作品令我感到很傷神，好像快要瘋掉。所以往往讀幾頁就放下，然後久久未能醒來。那天卓然老師在大課上問及那書中的第一句時，很自然就叫了出來。那句句子實在很浪漫。
至於陳慧，在初中時聽過她的講座，她給我的感覺不很作家，反而像個「師奶」，談吐很文學的「師奶」。一直到高中才再接觸陳慧的作品，原來小時候什麼都看不懂。到長大後，重新再把讀過的書再讀一遍，發現如獲至寶。
陳慧筆下的香港是個小都市，小得很溫馨，特別是那些愛情短篇，有些窩心，有些撕心，有些貼心。
不過，要是以陳慧為研究對象的話，該如何是好呢？
這又是一個謎，大家或許可以提供點意見。

苦瓜新食法

Week 10, Monday

        又撐過左一個不如意既上課周，終於可以有個「暫時」訓得安心訓得夠皮既星期五晚。訓得夠自然有活力，十點幾訓醒無野做，突然好想整野食，個腦一下就諗番起上星期「不寒領導人」俾既意見——「豉汁苦瓜、苦瓜炒蛋」，一於來個「豉汁苦瓜炒蛋」！

材料：苦瓜 x1、雞蛋 x3、自家秘製豉汁適量 (憑感覺)、油鹽糖適量 (憑經驗)

第一步，苦瓜照舊灼熟切粒。

第二步，將雞蛋「發勻」。

第三步，將豆豉浸水出味 (減少咸味)，然後「顏碎」(易出味)。

 

        準備好材料，開爐ready。首先，將苦瓜同雞蛋好似菜脯煎蛋咁煎埋一齊。(個人認為蛋唔夠，搞到散既瓜粒太多)然後，將調好味既豉汁落鑊一齊炒勻，可放適量糖調味。當炒到差唔多乾身就可以了。

豉汁炒前

豉汁炒後

        成個過程用左30分鐘左右。個賣相同我預期有少少出入，不過，如果好食就得啦，我相信憑住十幾年傍左阿媽煮「食送」既經驗，點衰個味道都會有個譜。試食，掂！只係有點淡，拿拿臨入盒連隔夜飯打包番工。呢兜野送白飯好OK，配埋同事罐辣椒醫之後味道更正，上次兜齋苦瓜係捱左三十分鐘，今次個「食送」就係歎左20分鐘！估唔到我仲寶刀未老。哈哈。Mission completed

河內塔征服記 上

WEEK 9 SUNDAY
MISSION : 解決河內塔3-10層


　　自從將俄羅斯方塊玩到封頂後，我一直搵緊其他智力遊戲當替代品，今次揀既係河內塔！！
　　河內塔（Tower of Hanoi）係咩黎？根據維基既講法，河內塔起源於法國數學家Edouard Lucas所講既一個故事，傳說古印度（另一說法為河內）某神廟入面有三條細柱，其中一條柱插滿64個圓盤，只要將全部圓盤移去另一根柱度，就會有大事發生云云，不過移盤時必須遵守兩個規定：1.一次只可以移動一個圓盤；2.大盤唔可以放o係小盤上，咁列底要移幾多次先可以搬哂所有盤呢？呢條數學問題就引伸左河內塔呢個遊戲出黎啦！
　　為左方便大家理解河內塔實際係點玩，本人用File同硬卡紙山寨左個河內塔出黎，請睇以下示範：

　　由上圖可見，遊戲開始時，組成三層塔既圓盤由小至大排列o係中間位置，首先將數字最細既圓盤1搬去左面，圓盤2調去右面，再將圓盤1疊去圓盤2之上，騰出左邊空間後，移圓盤3過去左面，呢個時候作為塔底既圓盤3已經搬離原來位置，跟要做既就係將圓盤2同圓盤1搬上去圓盤3度。到左step5果陣圓盤2上面會有比佢數字細既圓盤1擋住，所以要將圓盤1移去中間空位，再放圓盤2去圓盤3度，最後放圓盤1去圓盤2,3之上，得左！簡單d黎講呢個遊戲既終極目的就係將塔原來所處既位置改變就謂之成功喇。
　　塔既移動次數有一定既規律，一層係一次，兩層三次，三層七次，四層十五次，五層三十一次……除左第一層之外，塔既移動次數會係前一層移動次數兩倍再+1，套用返Edouard Lucas既講法，每層既移動次數都可以用遞迴函數（雖然我唔知係咩黎）計到出黎既，不過本人數學太差，玩既時候都係多數靠撞，仲成日重複步驟都唔覺tim！星期四果陣o係Bonnie同學既見證下，我用左差唔多五個字既時間移八層塔，為左一雪前恥我要解決十級！不過，河內塔既層數與遊戲難度同時間成正比，以笨拙既本人為例，玩四層26秒，五層58秒，六層2分26秒，七層 6分35秒…

（原片長度為10分鐘35秒）




待續……

週末快樂騎！

Week 9：Saturday
Mission：騎單車n公里

黎到第九週啦，見到個個組員係度咁努力做運動，筆者都唔執輸，挑戰騎單車n公里。今日既天氣都算唔啦，起碼唔曬先，涼涼地，最好就係出街做運動啦！

筆者的起心肝，為左健康，為左mission，約埋友人係屋企附近騎單車。平時都有騎下單車，但單車技術只是一般，只係適合短距離，所以就揀左係兩條屋邨來回來騎單車，又可以欣賞路邊既景色，個人心情都愉快D。由A邨踏到B邨只需要10分鐘，來回就用左20分鐘。當中發生左個小小插曲，真係有驚無險。話說我地貪方便，冇係該落車既地方落車，係天橋既單車徑度見到呢個指示牌，
代表D咩？

咁係代表騎單車唔准越過呢個個標誌，如果要繼續行，就必須落車，用手推車。
我地照騎過去，係半路果陣被交通警捉住左。呀！點算呢？佢會唔會抄我牌？（無牌可抄呢）要罰錢（太可憐了）？我地誠懇道歉之下，交通警放過我地！（感激中...........)
如果大家千祈唔好貪方便呀，記得要遵守道路安全使用守則。

騎左3轉之後，雙腳已經好攰，冇哂力咁濟。因此我地決定坐低休息閑聊。今日過左個幾舒服既早上，係功課，present超超超繁忙既時期，可以抽D時間輕鬆下，已經好滿足架啦！友人建議下次可以由東涌騎去迪欣湖！（心諗：要騎成兩個鐘呢？邊有咁好體力呀！）

迪欣湖 

不過果邊既景真係幾靚架，有人係度野餐，釣魚，仲有影婚紗相。

炒車

自從小一果陣學識騎單車，筆者一直都好小心地駕駛！從未發生大既意外，而小意外則有一次，話說果次發生意外既原因係煞車制神神地，筆者冇理到，照騎出街。結果呢，係落斜路轉彎果陣時，煞唔切制。跌到應一應，背脊赤赤痛，仲未以尾龍骨有事添。幸好，之後都冇事！安全起見，大家應該係騎單車既時候佩帶護膝護肘同安全帽，咁就萬無一失啦。

      


        藍色線係東涌既單車徑 

        紅色線係單車斜路 / 單車隧道 / 單車穚　　

http://www.td.gov.hk/mini_site/cic/tc/cycling-infrastructure/cycle-tracks-and-parkings/tung-chung.html
(部分圖片取自網絡)

削削削長長蘋果皮

報導指出

美98%蘋果農藥殘留 被列最骯髒蔬果

資料來源：http://n.yam.com/newtalk/international/201106/20110614115689.html

蘋果又甜又好食，所以種植既時候農夫一定會落重農藥以防蟲蛀。因此，報導都證實左蘋果有農藥殘留成份，洗完再削、削完洗你先會放心將蘋果放落口。高大全平時食蘋果一定會削走表面既皮，削蘋果皮真係可以睇出一個人既定力、專注力，要削出一條既快、靚、長既皮認真困難！Mission Possible削出一條快、靚、長既蘋果皮！

 (網絡圖片)

挑戰當日：

高大全一開始削既時候頻頻失敗，皆因用力過度一削就整片削走。再者，把削刀經已服務左呢個家庭有一段長時間，已慢慢步入退休狀態，所以皮難削、難削皮。

雖然削得好遲鈍，但係其後越削越上手，削出一條長長既蘋果皮，Mission都算成功啦~haha!!~

P.s.

經過今次之後，高大全認為要買把陶瓷刀

偉大的不遲到mission~

Week 9 wednesday
今日我要同大家一個報告一個令人欣慰的消息，就係我不遲到mission雖然差兩步就成功，但係我雖敗猶榮！！！

點解呢？請聽一聽以下兩位受訪者的訪問：

可見本人一直以來都係對遲到毫無反抗能力！所以本人上星期開始了不遲到mission，此mission可說是我不可能的任務，我抱著必「死」的決心挑戰它！

3月6號果日，我8點鐘就起左身，因為我知道我最厲害的特點就是能使不可能成為可能，簡單而言，就是平時明明有3小時讓我準備到上學，照道理我應該可以回到學校還有時間吃個包飲杯茶，但我總有辦法遲到，所以我第一日嚴陣以待，最後安全到達學校！

3月7號果日，返12點，所以都比較容易做到，加上我係咁同自己講，12點鐘堂都遲，你自己都無面見人啦！所以第二日都成功！有片為證：

但係點解星期四會遲到呢？皆因天有不測之風雲，人有霎時之禍福。3月8號果日，我一出邨口，遇見外太空飛來一隻UFO，全身發青光，我大驚，飛毛腿咁追住隻UFO，我諗如果我將佢影低，賣俾報館，咁我就發啦！跟住我追蹤隻UFO，睇佢個款應該想入侵地球，因為我跟蹤左佢橫越五大洲七大洋，點知跟下跟下， 我一時之間唔記得左返學校！但我深知我係為全人類做左一件十分有意義既事，雖然犧牲左自己，但我深信大家係會體諒我既~(其實我係發緊夢，遲左起身......)


雖然mission要求我返學一個星期唔遲到我失敗左，但相比之前我d同學講既不可靠數據，我已進步了50%，所以下次繼續努力，再挑戰過，希望下次我唔會再見到UFO啦！！！


                                                                   P.s:部分圖片取自網絡

減重第二彈

第九週，週二。

這一星期過得實在很精彩。

猶記得上星期上載了練習的片段給大家看，這星期繼續直擊減磅過程。這次拿一些更刺激的東西讓大家看看，別掩眼，唔得人驚既。

平常，除了沙包練習，在練拳時間中會有對打練習，(放心放心，點到即止)，目的是讓人習慣對打的感覺，出賽時才能不會害怕。第二，則是把平常所學的招式試做出來。
警告，因為很累的緣故，打得實在不好看。見諒見諒。

那不用練習的時間我們都在做什麼呢？
上星期說過，由於泰拳是需要極高的體能去支撐動作，所以平常時間我們會以跑步來作體能訓練。有些人甚至會做健身，一方面鍛鍊體能，一方面練氣。

跑步時間因人而異，以本人以說，一般跑30-35分鐘，前後均作5分鐘拉筋。別以為30分鐘聽來很少，其實會很累。因為30分鐘內你的身體不停地在運動，除非你停下來不跑。所以，別心急，其實這已經很足夠。

減重，不能只單靠節食，要健康地減，首要是多做運動，再配合適當飲食。

真想不到當初我們也討厭「吃苦瓜」

Week 9, Monday

      「除左苦瓜接受唔到外，我對其它食物都可以有好感。」這是筆者上星期飲二十八味時說過的話。都係個句，「人一世物一世，最重要開心得徹底。」反正想不到任務做，今個星期乾脆試下食苦瓜算了，或者唔會好似想象中咁難食呢。

        趁著周末番兼職可以遲起床，我就早早的準備好一個苦瓜，煮熟切片入兜，包好就出門了。話咁快就到下晝四點，我既 lunch time + break到了，公司既休息間都算寬敞，大玻璃望出去係維港景，望落樓下就係維園景。想靜靜地諗野既就望出去，想睇熱鬧既就向下望，點睇熱鬧？去飾櫃拎支徠卡或者施華洛世奇望遠鏡便可以了，前排有小型賽車比賽，呢兩個星期舉行緊花展！

         好快兜苦瓜就叮好左，我梗係沖番杯老細買既鐵觀音「慢慢嘆」啦(是老細買給我們飲的)。苦瓜既色已經變左黃黃地，真希望「越鮮豔既食物越有毒」呢句說話無呃人~

        入口o趙起來既感覺比起二十八味更苦更澀，粗略計算我用左三十幾分鐘先食晒一個苦瓜，感覺仲難食過麥皮，可能加上心情的影響吧，哈。食完之後陣苦澀味久久都不能散去，不過，我總算又做左個新嘗試，話晒苦瓜都係一種有益健康既食物呢。好笑既係我那兜打算用來「解毒」既麥皮用不著了，因為食完兜苦瓜之後好飽。

Chok! Chok! Chok!

WEEK 8 SUNDAY

MISSION：將淡忌廉chok到變牛油

為免每個星期都係好悶草稿post，我決定未畫完漫畫之前繼續做其他mission！

話說上星期我睇到一篇雜誌專欄教整自家牛油，原來只要將忌廉同波子放入玻璃樽度，用力搖足十分鐘就可以chok到牛油出黎，成功率仲高達90%，睇到我都想試下！本住六娘較剪組自虐既精神，我打算一開始唔用手，改以跳繩黎chok個樽，睇下幾耐先可以chok到牛油出黎。 

唔想洗樽既我於是買左支波子汽水返黎，倒200ml淡忌廉落去後咁岩到樽既一半，可恨既係個樽蓋爛左，搞到要用保鮮紙笠住。跟住我將個玻璃樽放入斜孭袋度，一邊睇住MUSIC STATION一邊跳，但可能跳繩本身既運動幅度唔大，跳果陣都聽唔到波子撞擊玻璃樽既聲音，跳左十分鐘後我拎個樽出黎睇，入面仲係液狀，於是我決定用返手CHOK。

因為冇蜘蛛手套既關係只好拎廚房紙巾黎防滑。篇專欄話chok牛油係冇技術既，只要猛咁搖就得架啦，搖到五分鐘左右就會變到固體狀，再搖多五分鐘就有牛油粒出現云云……一開始我雙手猛力搖，波子聲就好似打緊樁咁咚咚咚咚，不過chok chok下塊保鮮紙移位，淡忌廉由樽口溢出，我只好就住力咁搖，慢慢搖左接近三個字時間淡忌廉先變到半企身，然後就可以倒。

再搖多十分鐘樽內九成既淡忌廉都成粒，就算橫放樽身入面d野都唔會反落黎！跟住就可倒走多餘既buttermilk，拎d牛油出黎。

由上圖可見，原本純白色既淡忌廉已經變左淡黃色既牛油粒！手作牛油冇市面上買既牛油挺身，入口較滑，咸味仲可以自行調節，大家不妨試下！
P.S.但係第二朝雙手會肌肉酸痛

笨拙既手同結他唔夾！

Week 8：用樂器彈奏一首歌

大家記唔記得我上星期話要做咩MISSION呢？無錯！就係用結他彈奏一首歌。一個禮拜過左啦，成果如何呢？

真係要請大家多多包含，話說我由細到大，係音樂方面都好差，所以彈得咁鬼「屎」，請大家唔好見笑XD 又話說我家小妹有自學結他(雖然佢都好「屎」)，徵詢過佢意見之後，決家學WAKE ME UP WHEN SEPTEMBER ENDS。成個星期入面，學同練既時間真係非常之少。只係學左開頭果幾個音，而呢幾個較為容易既音已經難倒我！真係非常之「屎」，FAIL！

係學既過程入面，發覺自己既手指真係好唔靈活，轉音轉得好慢好慢。「手指到用時，方恨短」，以前都唔覺得自己D手指好短，但原本真係唔夠長，彈起上黎果時真係好吃力！例如下面果幾個指位，真係按得好勉強……因為手指唔夠長既關係，又按得唔夠實，所以D音唔準同埋無乜聲。

按到手抽筋！理得食指同中指，又顧唔到同無名指同尾指……

好似點按都唔就手，同埋按得唔實！

呢個音算係易按D！

 我隻笨拙既手！

 練左幾日之後，D指尖紅晒、有D酸酸既感覺。同埋D皮好似有少少變厚左！

宜家就俾大家睇下我既醜態……唔好笑我呀！