Mission Possible: 你都可以成為爆漫王！PART 1

Week 6：Saturday
Mission：將文學作品漫畫化

　　話說N年前果陣我曾經同朋友擺過同人誌檔（有興趣知道咩係同人誌既可參考NHK呢篇），不過當時我只係負責諗劇本同畫左幾張插圖，未試過真真正正畫成篇漫畫出黎。

當年既黑歷史手作書籤~~（賣唔哂屋企仲有一堆想要可留言）~~

記得以前我經常睇蔡志忠漫畫改編既西遊記，近排又睇過古屋兔丸畫既人間失格，今次我都想挑戰下將讀過既小說畫出黎！雖然而家大部份漫畫都係用SAI或者PS畫，但如果你畫既作品只供自娛，又唔想洗咁多錢買G筆同繪圖板既話，以下既工具都已經夠用，想拎黎出版既先需要用到有出血位既原稿紙。（唔想比ART SUPPLY呃錢買貴紙既人，不妨GOOGLE SEARCH漫畫原稿紙再PRINT一疊出黎）

準備工具（Total : $42）

黑膠$6

A4 Sketch Book $8　

0.1MM針筆 $9　上水彩唔會化開，勾輪廓線必備

Marker $11　塗黑用

3H素描筆　$5

間尺 $3

　　雖然用黑膠擦膠碎較多，但勝在碎粒實身一掃就會冇哂，相反白膠既擦膠碎都係粉狀散開，要將成張紙"登"起先清理到。

STEP

1.度劇本

　　劇本會用返上個SEM現代文學作品選某篇小說，至於係邊篇賣個關子先！既然有現成劇本o係度，當下要做既係諗下大約既分鏡，同埋設計角色、場景，想像下背景有咩建築物、人物著咩衫、室內環境有咩擺設等等既細節位，簡單D黎講即係度定畫面會有咩野出現。

2.資料搜集（擁有神畫技既人請跳過此步驟）

　　既然腦入面已經知道要畫咩，下一步要考慮既就係點樣畫佢出黎，除左直接參考實物圖照描之外，市面上亦有唔少教畫漫畫既參考書可用，不過我推介大家去www.pixiv.net學野，PIXIV（又稱P網）係一個大型既日本同人繪圖網站，每日有大量同人圖文上載，亦有唔少畫師分享畫畫既心得，教大家畫衣服摺位、骨架比例、透視方法等等，只要搜索”講座”連同關鍵字既日文，就可以搵到一大堆教學，例如我想學畫腳板， tag就係”足講座”，搜索完就一大堆教學。