沉迷遊戲唔會令你發達，只會令你變宅

WEEK 1 SUNDAY

mission possible:玩俄羅斯方塊玩到level 100

大家好我係子母奶！俄羅斯方塊係由前蘇聯既電腦工程師Alexey Pajitnov於八十年代開發既遊戲，如果大家細個果陣都係GAMEBOY玩家，應該對呢舊洋蔥頭一ｄ都唔陌生 :

畫面背景既建築物叫St. Basil's Cathedral（上圖攝於上年八月），係莫斯科著名景點之一，鄰近有GUM，紅場及克里姆林宮等等。

好啦講返正題先，時隔二十多年，而家Facebook上既Tetris Battle已經再冇洋蔥頭，對戰模式同方塊落下既攻擊力亦被重新設定，基本玩法可參考呢篇文章。

Mission開始前，筆者已有level 93。

雖然個起點有ｄ高，但其實筆者o係玩到level 90之後就一直屢戰屢敗、屢敗屢戰，對戰左五十多回都係ｏ係level 90-93間徘徊……

玩俄羅斯方塊最緊要既係速度，判斷力同埋策略。前兩者可以靠不斷對戰累積經驗，好似庖丁解牛咁掌握遊戲既規律，記住而家堆緊個塔既形狀，善用唔同方塊既屬性，減少製造空格，保持塔既平均高度，久而久之見到方塊就識得放o係邊。單純想練速度既可以凈係玩sprint同marathon，或者索性到商店提升方塊落下或旋轉既速度，商店度甚至有護級盔甲出售，怕降級既不妨買下。（由於筆者玩facebook game唔想洗錢，從來唔買過呢ｄ野）

只要專注力集中，手指移動得快，眼力好，你就己經係一個出色既鍵盤戰士！不過咁係唔夠既，因為level 90都好恐怖，疾雷不及掩耳間就已經掟左十幾個炸彈埋黎，到左呢個關口對戰策略先決勝負既關鍵。以前筆者既玩法好原始，起左個塔之後留一行空隙，等連續出現I方塊就放入去，但呢種方法既攻擊力最多只有十行，如果對方用T-spin既話可以一口氣整廿幾行過黎，足以拎兩三次KO。筆者冇買預見下一個方塊既功能，唔岩玩T-spin，所以選擇用COMBO既策略，盡可能延續方塊既消失，就算冒住出現空格既危險都要COMBO到底！筆者決定改留兩行方便使用唔同形狀既方塊，用兩行係因為之前嘗試用留三行既方法，但發現S型同Ｚ型方塊唔夠長好易令COMBO中斷，而且留得高好易被KO，留兩行比較保險。如是者咁戰左廿幾個回合，終於成功lv100，稱號係GOD OF TETRIS！

不過當你lv太高，想挑戰朋友果陣，畫面都會好親切咁提示你同朋友既"rank difference is too big"唔比你地一齊玩……總結一下筆者由上年開始玩，一共對戰850個回合，勝出588次，勝利率接近七成，若以每一輪對戰兩分鐘計，筆者已經玩左差唔多1700分鐘，如果將打機既時間拎黎返工，以而家最低工資$28黎計，筆者將會賺到$47600，可以拎黎交一期OU學費！不過世事係冇如果既…好啦玩到封頂後我會找尋另一個更有益既mission……