又撐過左一個不如意既上課周，終於可以有個「暫時」訓得安心訓得夠皮既星期五晚。訓得夠自然有活力，十點幾訓醒無野做，突然好想整野食，個腦一下就諗番起上星期「不寒領導人」俾既意見——「豉汁苦瓜、苦瓜炒蛋」，一於來個「豉汁苦瓜炒蛋」！
材料：苦瓜 x1、雞蛋 x3、自家秘製豉汁適量 (憑感覺)、油鹽糖適量 (憑經驗)
第一步，苦瓜照舊灼熟切粒。
第二步，將雞蛋「發勻」。
第三步，將豆豉浸水出味 (減少咸味)，然後「顏碎」(易出味)。
準備好材料，開爐ready。首先，將苦瓜同雞蛋好似菜脯煎蛋咁煎埋一齊。(個人認為蛋唔夠，搞到散既瓜粒太多)然後，將調好味既豉汁落鑊一齊炒勻，可放適量糖調味。當炒到差唔多乾身就可以了。
 |
| 豉汁炒前 |
 |
| 豉汁炒後 |
成個過程用左30分鐘左右。個賣相同我預期有少少出入，不過，如果好食就得啦，我相信憑住十幾年傍左阿媽煮「食送」既經驗，點衰個味道都會有個譜。試食，掂！只係有點淡，拿拿臨入盒連隔夜飯打包番工。呢兜野送白飯好OK，配埋同事罐辣椒醫之後味道更正，上次兜齋苦瓜係捱左三十分鐘，今次個「食送」就係歎左20分鐘！估唔到我仲寶刀未老。哈哈。Mission completed
@@嘩你真係新食法喎，好嘗試!
回覆刪除之但係呢.....苦瓜唔同熟法，個切法都唔同架~我再俾d意見你丫，下次又可以試下哈哈
炒蛋呢，通常係薄片。將個苦瓜中間破一刀，分成兩半，好似切木瓜咁，之後打橫切一片片，咁樣炒蛋先香。
切粒或者切成較大塊呢，通常係炆，因為大舊d炆起上黎時間耐d都唔怕d苦瓜爛曬，同埋翻煮多一兩餐個賣相都係返度。
我屋企就未試過好似你咁先將灼熟再煮，一煮直接將苦瓜落鑊喇。
同埋呢，我媽教煮苦瓜會多一個步驟，就係先用鹽將切好既苦瓜用手「省」一陣，將苦瓜既青味同苦味減一d，咁煮出黎既苦瓜就唔怕有草青味同太苦澀。
恭喜mission completed，仲係「嘆左」既情況下完成，讚好!
哈哈。其實我切粒前係好似你話咁破邊切塊，不過為左就番個食物盒size先切粒黎整。至於去苦味，我阿媽好似會用鹽水灼一灼。=D
刪除作者已經移除這則留言。
回覆刪除