蓄齊一SET食玩啦！

Week6 MISSION：蓄齊一SET食玩

不論係男仔係女仔，都會鍾意蓄東西。高達模型、信紙、擦子膠、漫畫、CD等等……你又試過蓄D咩呢？記得細個果陣，應該係由幼稚園開始蓄D得意既野，例如擦子膠、公仔貼紙、卡通簿仔。就連糖果紙盒都唔捨得掉，收收埋埋成櫃雜物，被媽媽視之為「一堆垃圾」，成日搵機會想掉我D寶貝。真係過分！

到中學之後，蓄既東西已經唔同。變成瘋狂咁蓄偶像既YES卡同CD。而家睇番果一大埋YES卡，真係有點無奈！所以3、4年前已經被我毀滅左，眼不見為乾淨！

到宜家廿幾歲，依然有蓄東西既習慣。例如戲非、雜誌、同卡通公仔。其實大家見到下圖既小丸子公仔，我一直都有蓄開，可以俾一部分俾大家過目:D大多數都係食快餐換番黎，有D係買食玩抽既，幾趣緻可愛！不經不覺，蓄蓄埋埋差不多成張書台都被小丸子攻陷左。

另外，漫畫都蓄左3層書架咁多。不過細妹蓄既比較多。不過，睇左咁多我既收藏品，大家有無留意到一個好大既問題呢！？可能好多人都有既共同問題……

哈哈！就係無樣蓄得齊一套！不論漫畫又好、食玩又好，總係蓄蓄下就氣餒！

X例如漫畫咁，有D追極都極唔完，太多集數

X例如一D扭蛋、食玩，抽極都係同款

X例如蓄貼紙咁，蓄蓄下無左個興趣，就無再追

全部都係D失敗既例子，從未試過成功蓄到一套完整既野東西

每次望見台上既公仔，都有種若有所失既感覺。所以，今次特地做呢個MISSION，最重要既係，想係逐少逐少蓄既過程入面，搵到重執收集物件既樂趣同埋一份成功感。

咁呢次要蓄既目標係咩呢？呵呵，係我細個好鍾意睇既一套卡通片入面既公仔——__ __。

答案係「姆明」呀！唔知大家鍾唔鍾意呢？

呢一套食玩係之前蓄落，叫Moomin's Lunch 2，都好奈歷史啦！係2004年，由北陸製菓株式會社出既，一套共有10款，入面仲有姆明公仔樣既餅乾。一見就對佢著迷，因為手工好精細！可惜，我只係蓄左其中呢3款！

係今年年頭，我屋企附近一間賣零食既店子入面，再次俾我遇上呢種姆明食玩！真係太好啦！於是，一氣之下買左兩盒。梗係急不及待，即刻打開睇下抽到咩人物公仔！嘻嘻，係史力奇同姆明間屋仔！就係咁不停咁買，一共分開買左6次先蓄齊。由於呢一套無乜邊個人物唔想要，所以想蓄齊一套！因此，抽到人物既先後次序並唔重要，最緊要係唔好重複就得啦！

大家睇到下圖，就知我MISSION POSSIBLE啦！呢一套既手工都一樣咁好咁靚，好期待下次出既，又會係咩造型呢？不過係抽既過程入面，重複左兩款公仔！真係唔抵。果間店子曾經張貼出告示，有完整一套出售。初頭都有D心思思想一次過買，但諗深一層，除左最後蓄到完整一套既時候會好開心之外，更加之開心刺激既係蓄既過程。因為每一次打開都有新驚喜，先過癮好玩！