開心SHARE之搞鬼朱古力！

WEEK 5 MISSION：請人食WASABI朱古力

經過我地呢組BLOG友努力經營，終於係大家心目中建立了一個強而有力既定位！！！就係自虐既WASABI組啦！！！雖然我係其中一員，但始終無膽挑戰食WASABI呢個死亡MISSION。

話說，情人節已經過左一個星期有多，大家對朱古力既熱情已經減退。 不過……大家仲記唔記得上個禮拜高大全整既魔鬼朱古力呢！？睇完之後，你係唔係都心思思，好想試！等我將呢個WASABI熱潮再炒起！

係2012年2月13日，即係情人節前夕，我決定搵「替死鬼」，幫我完成食WASABI既任務！真係好邪惡呀！

話說，我個計劃係……整一半正常，一半唔正常(即係加左料)既朱古力。

材料好簡單：

一支WASABI、一包牛奶朱古力、少許蜜糖

整既時候，我發現將碗朱古力放係鑊度，開住細火用熱水坐溶，比起只放0係熱水上面坐溶既速度更加快，同埋會溶得均勻D。姊妹們下次可以試下。

我既WASABI朱古力整法同高大全既唔同。高大全係夾D WASABI 係塊朱古力中間，而筆者既做法，就係等D朱古力溶到咁上下，就直接擠D WASABI落去攪和。第一次加既份量唔多，只係一粒豆咁多。攪勻之後自己試過味——係完全無WASABI味架！色澤同質地方面都無改變！就如下圖咁既樣……

之後逐少逐少加左幾次，都唔覺得有WASABI味！加到好唔耐煩之際，一手擠左成條差唔多有10 CM咁長既WASABI落去。攪拌既過程入面，感覺到朱古力D質地越黎越似水泥(嘔心的說囧)以為D水唔夠熱，再加多D 落鑊度，點知都係溶唔番液體狀態……

好奇之下，筆者只係試左少少，已經有預感個肚會唔舒服……唯有留番俾各位死士試下啦！！最後就將D朱古力倒入個模度，放入雪櫃等佢凝固！大家睇睇下圖，分唔分到普通同加左料既朱古力有咩唔同呢！？

好啦！踏入情人節之時，筆者精心炮製既朱古力亦都面世啦！加左層靚靚既包裝之後，睇落去個賣相真係唔錯架！分唔到邊D係加左料，邊D無加到。(只有筆者知道點分！哈哈！)

開始WASABI朱古力整蠱大作戰啦！有WASABI既，只有3粒咁大把，好矜貴架！而呢3粒咁罕有既朱古力，最後分別落左木又、奧蘭治同我個好朋友肚入面！

木又一試，即刻塊面紅晒。

奧蘭治邊食邊話好味，仲話可以量產添！

好朋友試果陣都面露難色。半個鐘之後，你地估佢係邊？

無錯！！！就係痴住馬桶無得走。
希望其餘兩位無中招啦！