都是那些年穿的……

WEEK 1 FRIDAY
MISSION POSSIBLE：uniform day

我係十蚊飯，龍年祝大家健健康康，快高長大，笑口常開！仲要記得 多D做MISSION，人都開心D！XD
入正題講呢個MISSION之前，試過上網揾D有關校服既得意野。原來宜家內地出咗一款智能校服，當學生遇到意外，按一下衫鈕，就會通知屋企人、學校同上面D警察，就搵到學生既位置。犀利！唔知洗衫果時D鈕使唔使拆咗佢呢？

好！講番正題，可能好多人都覺得著校服番學，難LESS！！！開頭我揀呢個MISSION果陣，都係下巴輕輕！校服小意思啦！著咗十幾年，宜家著得果一日，EASY JOB！

點知起身果朝，覺得忐忑不安！一嚟驚走路花佢哋「放飛機」唔一齊著，二嚟又驚著出街會好奇怪……原來發現3年無著校服，無啦啦著番會怕羞，怕人哋點睇！於是乎即刻張羅打鼓，搵盟友確認究竟係唔係執行呢個MISSION！

後尾換完校服，拍拍心口，行出房門，

第一個衝擊：媽媽不停追問

「哇！咩事呀你？」

「做乜著成咁？」

「著成咁去邊呀？」

「你要番中學咩？」

@$%#$%$&^*^&*&#$@$#%$%……

問完一大堆問題之後，我當然快快手拎埋D野衝出門口！

行到落街，係朝早9點幾。唔知大家會唔會有咁諗法——過咗正常番學既時間，著住校服係街度行，驚D人會當自己係 逃學既學生 = 壞學生 = 成績差既學生 = 壞人！！！ (可能我比較低B)

我諗好多同學仔都答過「你認為上學應該穿著校服嗎？」呢D類似既問題……我果時當然係話唔應該著啦！日日著出街D衫，幾FREE、幾型、幾方便！世事就係咁，細個想快D大個，到頭來大個咗又想變番細個。放低校服呢3年話我知，原來著校服番學都可以CARE FREE！單係唔使日日煩襯衫，就已經解決到好多問題。最簡單方便，一件過，笠落身，轉個頭就出得門口，唔使愁！

話說番到學校，第二個衝擊：引起好多好奇目光！

的確同預計一樣，好多人都問做乜著成咁！都幫我哋個BLOG做到宣傳效果，一石二鳥，唔錯！其實自己好無膽，今次呢個MISSION可以稍稍鍛鍊自己既膽量，習慣人哋既目光，都係有所得著。

放學果時，我哋仲回到那些年，玩揭裙仔，玩得好開心！如果你哋都想重拾過去既點滴，不妨一齊玩呢個MISSION，一定有所體會！