Mission Possible

2012年3月15日星期四

挑戰用紙網撈金魚GoldgoldgoldOleOleOle

Week 8:挑戰用紙網撈金魚

高大全細細個睇日本卡通片，經常見到卡通人物撈金魚既畫面。上網搜尋後，發現原來撈金魚係日本人經常玩既娛樂活動之一。撈金魚呢種活動仲係日本奈良縣大和郡市發展為觀光事業，自1995年後每年8月都舉行「全國撈金魚選手權大會」。
(資料源自http://zh.wikipedia.org/wiki/%E6%92%88%E9%87%91%E9%AD%9A)

日本既比賽太遙遠，不如近近地睇下台灣既撈魚比賽！

雖然片中既冠軍係撈輕到不得了既孔雀魚，但係紙網撈魚撈到變比賽就知此活動並非易事！高大全決定今次既Mission Possible就係用紙網撈到最多既金魚！！

挑戰當日：
眾裡尋他千百度，原來撈金魚既攤位就係屋企附近，高大全仲要專程去元朗搵……真係好豬……

結果，我都唔知實數撈到幾多，只係知道最少有12條金魚！諗住學人地將紙網打斜撈，原來現實真係有難度，因為一斜左連條魚都跌埋……Anyway，有咁多條成績都不俗，真係連自己都要拍手(自誇中)！或者讀者們會係影片中悟出撈魚既技巧呢~~~

戰績：多過12條 =好多條

哇！真係好多魚啊！
其實兩幅圖金魚既數量係無分別架~只係大筒轉細筒~(係被發現前自首)

P.s.

全場只有一位好細好細既小朋友同高大全撈魚，撈金魚挽回不少青春、童年。

小魚兒大茶飯

2012年3月14日星期三

突發Mission-油女洗手間標誌

Week 8 wednesday
人生多變，本來諗住做返學唔遲到既mission，但今日放學去洗手間，遇到油漆師傅係度油廁所標誌，我一邊行，已經一邊眼超超望緊人地係度油油，到左女廁門口，真係忍唔住問：「可唔可以俾我試下？」

油漆師傅又好好人，唔驚我地搞搞震，俾我油，我見機不可失，因為唔知幾時先有機會係學校留低D野，所以人地肯俾我油，我緊係嘔飯應！佢仲好放心，教埋我地油，油錯時就同我地講d漆可以稀釋，所以油錯或者滴落地下，都好容易可以洗左佢！

油漆師傅一講完，我就開始油，佢之前已經油左個頭，咁我就由個身開始，油呀油呀，好開心，諗返自己細個果時想做畫家的夢想，雖然只係一個夢，不過都係一個美好的回憶，自己做唔到畫家，幫下人油下油漆，人地又開心，自己又開心，大家都開心，快樂真係好簡單，跟住見十蚊飯幫我錄影，知道佢對畫畫都好有興趣，所以又叫佢畫埋一份，佢又好開心，我油完身就到佢油腳，佢都好比心機油，最後九樓女廁個圖案就由我地兩個加油漆師傅三人夾手夾腳完成！

好o野！！！大家得閒行過九樓C座女廁，就記得欣賞下我地既大作啦！~

2012年3月13日星期二

如何做運動─大揭秘！

話咁快來到第8周，星期二，我是雀屎。

話說，一個多月前一個mission是「做運動來省錢」，做運動是還可以持續，但省錢嘛，有點難度，實在有難度。
現在呢，就把日日運動30分鐘的實況呈獻給各位，諸位兄弟，小弟獻醜了！

小弟由中五會考之後，開始學泰拳，至今斷斷續續，學了4-5年。未接觸過這運動的朋友，可能覺得這是血腥殘暴的運動。其實嘛，只是用手手腳腳打下沙包而已，大家別想太多。如果說這運動容易弄傷身體，那麼我勸大家什麼運動都不要做啦，因為打籃球會斷手，踢足球也斷腳，打網球會有網球肘。
別那麼婆媽啦，做什麼運動都會弄傷。學習一下拳腳功夫，伸展一下，泰拳的運動量也蠻大的。

這個影片，是今天在訓練場特地錄的，本來有四分鐘，經過本人差勁的剪接技術整理後剩下1分鐘，如此「核突」的動作就別看四分鐘，大家看一眼好了，免得晚飯吃不下。

入正題。

練拳時，是以回合計算的。每次練拳歷時大概是一個半小時，4分鐘一個回合，休息30秒，然後再4分鐘，如此類推。

要是有其他人或教練在場，就會進行對練。不過，今天我特地去錄影，就只有自己。這些時候，通常會對沙包練習。

泰拳的招式變化多樣，主要由拳、腳、肘、膝的動作配合，打出不同組合的招式。別以為泰拳是很容易學的，都是普通的出拳腳。其實是易學難精。

一般沙包練習時應多用拳腳、拳膝組合打，例如3個拳跟一下踢腿，4個拳跟一個膝撞。這些組合變化多端，沒有既定規則，只要你站在沙包前，跟著自然動作就可以，當然動作要適當。

由於運動量大，泰拳運動員多會配合跑步來增強體能，看起來拳腳拳膝打起來不費氣力，其實很累。你看我在最後30秒已經跳到不想動，其實我是在訓練完才拍這個片的。所以，平日的體能訓練對泰拳運動員來說也是很重要的。

每天30分鐘運動，對於功課忙的時期是很苛刻的，因為那30分鐘足夠你坐在電腦前寫一篇blog文，快速時甚至能做好一份essay。不過，小弟依然堅持每星期也至少練習兩至三天，平日有空時跑跑步。就算不像組員們有減肥mission，也該時時讓身體健康。

對了，你們，別只顧節食，應配合適當的運動才是最佳減肥法！

2012年3月12日星期一

飲二十八味

Week 8, Monday

夏桑菊、夏枯草、雞骨草、板藍根、銀菊露、木棉花茶、野葛菜水……我都飲過，主要係阿媽煲，至於話自己特登去涼茶鋪飲就未試過。話說某日友人談起放學去飲涼茶，筆者本住人一世物一世既心態，決定與「敵」同行，因為友人話想鬥快飲完碗涼茶喎~

到達涼茶鋪，揀好飲二十八味，筆者就奇怪，以前只係聽過二十四味，原來出到二十八味了？定係個牌打錯字？吾理喇，筆者自問捱得痛捱得苦，除左苦瓜接受吾到外，我對其它食物都可以有好感。好奇之下問左個位涼茶嬸嬸：「比24味多左邊四味？」嬸嬸無答，但就搞笑咁話：「咪當送多四味俾你地囉。」

說時遲那時快，友人便提議開始比賽了，賽果合理，至少對我黎講。

講番碗28味，入口個下真係幾苦，加埋個口有舊香口膠，我想大啖快飲都吾得。雖然不失苦茶之名，但係比起筆者以前飲過既極濃極苦既中藥，仲有少少距離。最後，筆者發現原來街邊企住飲涼茶都幾有趣。

下係有少少關於涼茶既資訊：
雖然名為廿四味，但所用的藥材由十多味至廿八味不等，並沒有劃一標準，需視乎不同情況(如體質、天氣、病情、地域)而加減，《香港中藥材圖鑒》一書亦只列出二十味。

廿四味材料：崗梅根、水翁花、布渣葉、救必應、鴨腳木、黃牛茶、雞骨草、三叉苦、火炭母、山芝麻、金沙藤、金錢草、土公英、枇杷葉、車前子、淡竹葉、大青葉、板藍根、桑葉、白茅根、銀花藤、六月雪、木棉花、金鈕扣等二十四味組成。有去濕清熱、涼血解毒、解表的作用。(無常方，成份可由十多味至二十多味不等。此方較為常用的廿四味。)

飲用廿四味有甚麼要注意呢﹖
廿四味之主要藥材的性質偏於寒涼，所以體質虛寒之人士(例如手腳冰冷、臉色蒼白、怕冷等)及孕婦均不宜飲用。此外，坊間所見的廿四味所選用之藥材各有不同，所以容易出現藥物敏感之人士或者正在服用西藥期間，也不宜飲用，以免產生副作用。

相關資訊取自：
http://apps.hi.baidu.com/share/detail/34444972
http://hk.knowledge.yahoo.com/question/question?qid=7009122201147

2012年3月11日星期日

你都可以成為爆漫王！PART 2

WEEK 6:SUNDAY
Mission：將文學作品漫畫化

PART 1連結

　　今日同大家講既野係畫分鏡！分鏡係咩黎？根據WIKI既定義：「漫畫上的分鏡（ネーム）是描繪漫畫時如同設計圖一般的東西。與電影的分鏡，戲劇的場景接近。在其上記載著，要如何分配畫格、以什麼方式展現角色、要讓角色說出什麼台詞等內容的東西。」簡單Ｄ黎講即係點分配同呈現劇情。

畫原創漫畫既可以直接將諗到既畫面畫出黎，但因為我挑戰既係改篇，所以要先拎部原作再細讀，考慮有冇可刪減增加既部份，然後做筆記，如右圖所示，highlight標記會畫既場面，引號標記格數同次序，underline標記對白，成本野都比我mark到花哂…

　　畫草稿時仲要注意既分鏡既次序，大家請睇下以下三幅圖：

右：あずまきよひこ《四葉妹妹》
中：小克《偽科學鑑證4——愛令我變碳》
左："Embroideries" by Marjane Satrapi

　　橙色線係讀者閱讀既順序，日本漫畫既分鏡大部份都係由上至下，由右至左，分格空間按劇情需要切割（見右圖），連環漫畫既分鏡可以係直線、橫線、S型或Z型，分格空間均等整齊，畫面情節有連續性（見中間圖），左圖係介乎於繪本同連環漫畫之間既另類例子，既冇用實線切割分格，亦冇特定閱讀順序。

　　對新手黎講連環方式分鏡好似係最易掌握，所以我都咁畫，努力左接近一粒鐘終於畫左一頁（鉛筆稿太淺色請見諒），呢度小小既十二格塞左原作小說一頁半A4紙既劇情！由於我平時鍾意畫人同衫，除左素描之外好少畫建築物，而家一畫建築物同背景都要一邊望住參考圖一邊描，搞到作畫速度相當緩慢！幽遊白書作者富奸老師曾經講過，週刊漫畫家每星期交稿十九頁，平均每日睡眠時間只有四小時，職業漫畫家要用一星期先完成到既工作，我o係冇助手既情況下，預定畫30頁既計劃（一共360個分格）到月尾都未必實現到，恐怕都要再刪節又或者簡化重畫呢……

2012年3月10日星期六

蛋變：糖心變茶葉

圖取自朋友facebook

Week 7：Saturday
Mission：學整新料理

話說有一日筆者係FB度睇到朋友 post左張糖心蛋既相..
佢打左句-->「呢隻糖心蛋我俾十分滿分!」

筆者見隻蛋既賣相咁靚，心郁郁想試下整黎，於是乎上網搵下整糖心蛋既做法。當中整滷汁既材料都有Ｄ唔同，有Ｄ人會用味琳或滷包代替生抽，整法基本上都係大同小異。點先叫做糖心，
即係蛋白熟但蛋黃半熟。溫泉蛋就係蛋白半熟，蛋黃熟。
Ｄ網友話好容易整，究竟係易定難咁就要整過先知！

八角(街市賣兩蚊一包)

首先係要煮好個滷汁先
滷汁既材料：
筆者整既滷汁係自己隨意咁落，就地取材！（屋企有咩就落咩，冇落到胡椒粉，辣椒仔）
水同生抽既比例2:1，（如果想咸D可以1:1或者用老抽)
落埋八角、蔥段、半茶匙糖、1/3茶匙麻油同少量米酒。
用中火煲10分鐘，再轉細火煲5分鐘後可以熄火。
咁就會聞到好香既八角味！
係等滷汁降溫既時候，就可以煮蛋啦！（大約降到好似沖涼水既溫度，四五十度左右）

攤緊凍既滷汁

搞下D蛋

煮蛋第一件事就係要解凍，岩岩係冰箱拎出來就擺一個鐘解凍，如果唔想等，就可以直接用水喉水沖下佢！先落4碗水煲滾，之後落蛋（見到網民話落蛋前要落1/3碗自來水，
D蛋好容易因突然外殼加熱而爆，所以要用自來水降溫），
筆者照做..................................
落蛋用勺子搞下D蛋，咁樣D蛋就就唔會因為地心吸力而偏埋一邊，蛋黃容易Ｄ係蛋中間。
滾左4分半鐘後撈，即刻浸係水喉水度剝蛋殼。

筆者發現D蛋殼超難剝，越剝越灰心.......
剝完之後，蛋既表面有好多窿窿，又有D係剝爛左...........
拎上手，Feel到隻蛋彈下彈下，蛋白未熟得哂，蛋黃完全唔熟！唉！

呢4隻蛋就變成左蒸蛋，晚餐加餸！
唔通就咁Mission failed！筆者唔甘心！於是唔敢再剝啦！
決心將剩低果3隻加埋多幾隻新蛋烚熟，大約10鐘！
唔洗剝殼，直接放入之前整左既滷汁度，待涼！
搖身一變為茶葉蛋！
係待涼呢個時間，筆者出左門口，返黎之後D茶葉蛋唔見哂！
被家人一掃而空，佢地食完之後仲問我D蛋係唔係可以食的！
我話要浸返兩日先入味，佢地回應「聞到D蛋好香，忍唔住食左！」

筆者再接再厲，第二日烚左4隻蛋(全個冰箱得返4隻)，想烚多D都唔得！