我做左DEMI-GOD！挑戰成功鳥！

話說上回講到要挑戰俄羅斯方塊100級，高大全經過兩個星期後終於成為半神人！！我成功啦！

高大全之前一直都係係97至98級徘徊，一時就去到99級3星(HEAVEN)，一時又被對手打到落97級無星(HELL)，真係激起我要報仇雪恨既心！近日又為左功課問題一諗唔開就要打Battle比自己發洩下，點知越有壓力就越玩越勁，一打就打到100級啦！！以下就係轉成半神人既過程：

97級連續炸14個炸彈，真係諗起都好爽

升到98級啦

 越炸越勁，連續20個Bombs哈哈哈哈哈哈哈哈

99級4星就黎100級！！

 好Yeah!!!!Mission 成功！！

高大全提提你，想升級絕對係一件難事，所以需要以技術取勝。

一、挑戰喜歡玩的方式：組員子母奶就鐘意玩None，高大全就鐘意玩Set Map，因為高大全拆積木既能力比砌積木佳，如果你自認鐘意拆積木不訪試下Set Map。

二、欺凌對手：眼見隨機既對手實力太差，例如連續Ko兩次或以上，不妨同佢玩多幾回拎多幾粒星。

三、用錢撻你：話說每玩一次battle就有coins賺，coins可以拎黎買保護甲。如果唔想晒時間降level，倒不如用coins買下保護甲。呢個就係現實世界中有錢萬事得既道理啦~~~

P.S.

事實上，沉迷玩樂唔係一件好事，不過有壓力時打下Battle真係發洩到~~~

挑戰俄羅斯方塊100級→ http://handsomealex.blogspot.com/2012/03/battle.html

我以後不再涼薄（下）

古語有云：「好的開始是成功的一半。」

我覺得錯晒囉。

星期一番學校做PROJECT個時都好地地，成日冇俾人加過分（又或者係因為MISSION POSSIBLE友唔響到，所以冇人計我分啦）。點知跟住個日星期二番學就出事喇。

星期二第一堂係親切既曾卓然老師既廣告科，開始說下教、講下考試範圍都正正常常。後黎竟然無啦啦拎番上個禮拜個份別字作句出黎同我地開心SHARE順便抽水，早知就上個禮拜唔鬼交啦！

我嚴正抗議：明明依句作句功課係響MISSION開始之前，咁都要扣？！但係學校往往就係社會既縮影，響依一堂上面親身體驗到咩叫大石壓死蟹同咩牆頭草，實際上係最涼薄既曾卓然老師講到話要加分，MISSION POSSIBLE友即刻有風駛盡艃，梗係義不容辭幫我加啦。就係咁樣，乜都無做過就俾人加左成五分囉。跟住過去醫療輔助隊食餐飯都冇啦啦俾人加左幾分，計下計下響當日下晏上尊貴的黃博士課堂之前，我已經去到十九分，爭一分就爆∑（゜口゜；）最後個一分，係我唔出聲垂死掙扎去到寫當代文學既EVALUATION SHEET既時候俾MISSION POSSIBLE友捉到的，佢地一見到我寫後面如何改善課堂意見個一句既時候即刻好HIGH咁樣加埋最後個一分……

想知我寫左D咩？有本事你咪去搵番我填個張黎睇下囉～死響尊貴的黃博士手上，心甘介抵。

於是一爆左之後，我就真係爆喇，爆發番之前幾日谷住谷住既涼薄QUOTA。雖然小柑話我好似仲未恢復100%既狀態，但係我都好努力咁調整，到尊貴的黃博士點名叫同學出黎唱歌仔，我將崩潰人推出去個下，班老死話簡直要扣多20分咁話（￣∀￣）


咁家下MISSION FAILED，唯有接受大懲罰——扮吳建豪。首先睇下原裝正版：

睇完？依家去片！

順便賣廣告：大澳勝哥仔粒粒蝦膏，你買左未啊？

http://www.youtube.com/playlist?list=PL55384BA491D62C4B

舊帖重溫：我以後不再涼薄（上）

不能說的秘密任務(下)

Week 12, Tuesday

        相信有上今日當代文學堂既同學都睇到左感人既一幕，無錯，呢次任務就係聊表謝意行動。話說我們快畢業了，除了要感謝一眾老師同導師外，三年黎一直係背後默默為大家服務既仲有T小姐，記得張生同楊生急call 七樓同事拎文具嗎？ 哈哈

        今次行動可以話屬機密任務，所以愈少人事先知就愈好，是次行動組成員包括筆者及另外四名同伴——DW、 威廉先生、勝哥仔、橋王。行動要係星期二(今日)堂上進行，所以，星期一要安排好D野——朱古力、花、感謝卡。

        17：00PM左右，任務順利完成，感謝代表送上禮物既同學，還有各位既熱烈掌聲。同場加映師生大合唱，仲有一車零食，最後一堂的確係難忘D。

我都好想食

持花者是勝哥仔

感謝卡材料，製卡者是勝哥仔

這是一次難忘的任務

        買126人份量既零食真係唔簡單，如果大家覺唔夠食既，係呢度同各位講聲唔好意思。師弟妹們，下年買夠兩車好了。

不能說的秘密任務(上)

Week 12, Monday

      如題，一切暫時無可奉告，想知詳情，明晚自有分曉。抱歉。

方塊有何難！有何難！

Week 11

Mission: 方塊突破20lv

話說幾個月前，子母奶叫哂我地去玩Facebook 既Tetris battle，佢話「好好玩架，快d去玩下啦！」結果大家都中哂毒，玩到上癮。子母奶係方塊達人就唔洗講，玩方塊玩到出神入化，冇哂朋友。而高大全急起直追，直逼100lv。筆者今次既mission係要係一個鐘內突破20lv既關口(原先係18lv)，升2lv應該唔係好難吧？

方塊細細個就有玩，果陣時用左五蚊買左個俄羅斯方塊電子機返黎玩！打到d制失靈先捨得收手。今次筆者一開始係用netbook玩，超塞！！一路咁輸，於是乎就「搶」左大機既keyboard黎打，贏返幾局。玩方塊真係可以玩到好緊張，勁大力咁禁個keyboard，點知比啊妹話「你唔洗咁大力架！」(玩得太激動嘛……)

今次拎第二名，贏1個coins！

結果玩左成2個鐘，真係欲罷不能！好想將輸左既coins贏返黎！

睇黎我要好好地睇返子母奶既攻略！學到三成都好啦！咁就唔會下下輸比對手！

20lv呢個關口真係好難突破，經過一輪既激烈對戰，跌到15lv……

筆者只能說，今次既對手實在太強了！

Mission failed！！

方塊難難難！！

恐怕要請打手幫筆者贏coins，之後比筆者輸返哂！！

今次打機就係用左Debut Professional Video Capture Software黎影錄影，仲可以剪埋片，打機之餘又可以溫下書，都幾好架！

Ps: 係手機down左方塊黎玩，開頭超級slow，玩到冇乜心機，點知一去到lv9，就落得勁快，玩到81條lines就輸了。

我以後不再涼薄（上）

四月三日

今日收到老師同同學既意見，話我份人太過涼薄！我本身個人雖然涼薄，但係其實都好隨和同從善如流，所以痛定思痛，決定實行「我以後不再涼薄MISSION」！（鼓掌）直到下星期五為止！（再鼓掌）

不過涼薄依家野，除左天生仲有家教，大大話話都涼薄左十幾廿年，一時三刻要我改，真係幾難。個日放學響PC LAB見到池佐島夜香已經忍唔住抽一抽水，再睇下我個日UPDATE左既STATUS就知道我有幾慘喇(/__\)

班MISSION POSSIBLE友一聽到我發誓唔再涼薄（直到下星期五為止），即刻好熱心咁樣不停裝傻引我涼薄吐槽佢地；更甚者就係要發揮涼薄因子，替代我既涼薄位置，連平時溫柔婉約既十蚊飯竟然都：「係囉！曾卓然D字真係好醜樣，好似佢個人咁！」

不過話說回來，個STATUS出左之後其實都係得唔夠10個人讚好，其實係咪即係大家都唔係咁想我唔涼薄？(^3^)

四月四日

今日放假，不過約左小柑、史柏特等人番黎學校一齊做PROJECT，繼續實行我既「我以後不再涼薄MISSION」。

要一個涼薄既人無得抽水，其實同我地要一個道友戒毒都差無幾。睇下科學生活點講：「對涼薄者而言，對抽水的精神依賴遠比對抽水的身體依賴更讓人難以擺脫。一旦出現精神依賴，即使經過脫涼薄治療，在急性期戒斷反應基本控制後，要完全康復原有生理機能往往需要數月甚至數年的時間，對抽水的依賴性很難徹底消除。這是促使許多涼薄者戒抽水後又不斷復抽的原因。」（資料來源：科學生活：針刺戒毒是否可以根除心癮？，http://big5.gov.cn/gate/big5/www.gov.cn/fwxx/kp/2009-07/27/content_1375739.htm，瀏覽日期：2012年4月4日。）

雖然我努力將自己既心神專注響工作上面，但係組員之間風花雪月、談笑風生，無可奈何好幾次都令我抽水癮起，要貫徹實行今次依個MISSION，隨時難度仲高過上次既捐血MISSION啊！

四月五日

黎到MISSION第三日，依然係千辛萬苦，皆因坐響子母奶、麵包超人等人隔離真係好難忍！尤其是係十蚊飯，都唔知佢有心定無意，成日都俾好大個位引誘我抽佢水(/__\)

而且今日係MISSION一個重大轉捩點：引入計分制度！

話說今日同MISSION POSSIBLE友講番，今次依個「我以後不再涼薄MISSION」我會投稿過黎依到，有人就問：「咁點先為之MISSION FAIL先？」我：「咁不如我每一次唔小心涼薄，你地就幫我MARK低啦！」於是，決定左以二十分為上限，每涼薄一次就MARK一分，MISSION FAIL既話我就要扮吳建豪！

雖然扮吳建豪係唔會難倒我既，但係我係唔會俾自己再一次MISSION FAIL既！……想就係咁想，不過第一日已經極速累積左四分！(/___\) 黎梗雖然一路去到星期二先要再番學，但係照住咁樣既速度黎睇廿分應該好快就會爆……唔通我真係要扮吳建豪？！

下星期繼續！

整甜品

week11 wednesday

今次係我人生中第一次整甜品，整完呢款忌廉慕絲杯，我確信自己係唔中意整野食既。

話說未開始整，就已經俾阿媽鬧我做乜整野食，皆因我平時都係等食，都唔駛自己整，所以阿媽勁驚我整到周圍都污髒晒，所以唔俾我整，但因為我之前應承左人，又應承左自己，所以即使被阿媽一邊「鵝」，都要一邊死頂整埋佢，以下就是我既親身整甜品實錄：

step1：浸魚膠片，d浸魚膠片好簿好透，都睇佢唔到！

step2：打淡忌廉，都唔知佢講既7成即係幾多......

step3:一邊加熱d材料，一邊搞勻d忌廉同乳酪(一腳踢，頭都暈埋)

step4：最後將上面果兩樣野撈埋

final step:，入杯，係咪好靚呢？哈哈

過程睇落好簡單，都用左我個幾兩個鐘，而且整野食真係會整到頭都暈，特別係見到以下既情況：

大把野執、大把野洗……

最後，我覺得整野食真係好辛苦，工程浩大，難過我做功課十倍唔止，唔怪之得出面賣甜品咁貴啦！

花絮：

個磅睇落係唔係好pro呢？不過整既過程中，從來無用到佢量份量……

面對最大誘惑

week 11 tuesday

其實減肥真的很困難，難不在唔食同勤力做，難在意志。
正正式式節食和運動，大抵有兩個星期左右，只有數天「偷懶」過，吃多一點，少做一點。即使是忙得要死那星期，也堅持要做運動，結果呢，工作進度非常良好，因為很累嘛。累的時候工作速度自然快，因為要早早睡去。
這幾天，因為要去飲宴及工作的關係，真的沒有一點做運動的時間，只有星期日的早上跑了一下步，心裡有點納悶。
幸而，接下來的星期二和三也練拳，罪疚感少了一點點。
減重的目的，是因為7月時可能有泰拳比賽，要減大概二十磅。提早一點進行減重比較好，之後也可以輕鬆一點。
減重期間，最大的誘惑是食物，準沒錯。對抗美食的誘惑實在是很困難，需要驚人強大的意志力，最好有人陪。

這是第一個MISSION：對抗美食的誘惑，盡快減重。

MISSION第二：讀書讀書讀多點書。是日，在旺角的新亞二手書店買了6本書，只花了65元。這間充滿人情味和書卷氣的二手書店，只賣文、史、哲的書。同時，這間書店也收買舊書，同樣也只收文史哲的書。同學們，有舊書不要想出售便送到這裡去吧。
這天，買了本我小學時代很喜歡的張小嫻，是舊版的，不過不是最舊，第二版，這令我很感動。還有一本原價是28元的亦舒，不過這本沒有看過。
想當年，張小嫻的「麵包樹」系列風靡一時，朋輩間的女孩子大抵沒有誰不喜歡看。
到長大了，覺得張小嫻的文筆一點也不好，吸引的只是她不久寫出來的「金句」，和小說的感覺，文裡行間總是很小說，特別吸引女孩子。現在重讀，感覺湧現，靈感也源源不絕。

同睡魔死過

Week 11, Monday

        話說星期五半夜被一陣肚痛整醒，搞到無覺好訓，朝早起身成個人謝晒。直至放學個陣個肚仲係隱隱作痛，個頭wing wing地，食過止痛藥同整腸丸都無用，即刻睇醫生。哦~原來又係感冒黎探我(上個月先黎過)，今次仲帶埋菌入腸，多得佢地唔少，令我「陣痛」左成日。

        筆者自問從來唔驚食藥打針，唯獨係驚食完藥之後既睡意發作，每次食完之後幾個字就會完全喪失戰鬥能力，所以之前既病唔到頂唔順都唔會輕易求醫。係忙於清理功課既呢幾日先病經已大劑，醫生仲要開八種藥丸我歎，諗起都暈。如是者，星期五、六連續兩晚食完藥就被KO，極速訓著，所以，今次mossion係夜晚食完藥(11:00 PM 1-4-2012)對抗睡意，目標點數唔知，總之要撐到做晒希望完成既進度。 (12:41AM   2-4-2012)

8粒藥丸(最右個隻丸今日lunch 食晒) + 1支藥水

現在是1:19AM ，已完成對同學評論的準備，感覺良好，零睡意，不過好累。
1:41AM，初步構思好文化功課的答題方向，開始fing頭保持清醒。
1:47AM，連打呵吹，腦部開始缺氧，飲水保持清醒。
3:45AM，個頭好重，已經諗唔到野，唯有收檔。

        可能係我既病已經好番，呢種眼訓感覺並唔係食藥後個種，而係副「計」話我聽要休息了。總之呢個mission係成功的！起碼俾左動力我去撐住，至於功課進度嘛，仍然緩慢。不過，而家訓既話，我好驚朝早起身「瀨野」，想知點解，留意下星期既mission~！ 3:54 AM，熄機訓覺。

除了餃子和芝士餅以外……

Week 9 Mission ：整野食

講到整野食，同學都話我好在行。

我識整餃子、餃子、餃子同餃子……

仲有藍莓芝士凍餅、士多啤梨芝士凍餅、芒果芝士凍餅！

大家都俾我呃左！其實我黎黎去去都係識整兩樣野！真失禮！

因此，為保自己既聲譽，決定學整新野食！

噔噔噔噔……就係士多啤梨乳酪慕斯杯啦！

材料有：

1. 士多啤梨茸

2. 原味乳酪

3. 淡忌廉

4. 檸檬汁

5. 砂糖

6. 魚膠片

step 1：
魚膠片放係凍水浸軟備用。

step2：
將淡忌廉打起……

忌廉好難打得起！

開始成形啦！

                                打到好似上圖咁既狀態就差唔多啦！

step3：
將糖、檸檬汁同士多啤梨茸撈埋，再瀝乾魚膠片既水份，放埋落去，坐熱水攪溶。

step 4：

淡忌廉倒埋落去士多啤梨漿度，再加埋Ｄ淡忌廉落去，打勻。


step 5：
倒落杯度，放落雪櫃度雪就食得啦！
超簡單，又好味！

唔知大家有無去過港台呢個網址呢？

http://www.rthk.org.hk/elearning/dessert/cake.htm

入面既甜品種類唔算太多，但每樣甜品除左有食譜之外，

仲有埋短片，真人示範教你點整。

對於新手黎講，唔肯定D步驟係點，睇短片就實在好多啦！

可以係屋企一路睇住片，慢慢跟佢D 步驟去做。

跟唔切，又可以按暫停，翻睇翻睇再翻睇都得！

超級方便~

挑戰俄羅斯方塊100級

Mission Possible：挑戰俄羅斯方塊100級

相信有留意過我地個blog既讀者，對於挑戰俄羅斯方塊既mission一點都唔陌生。話說之前子母奶玩Tetris Battle已玩到100既 神級地位，高大全受子母奶既啟發都要挑戰100級方塊！！

俄羅斯方塊既考速度，又考對策，真係一唔留神就會輸到崩潰。話說係年初既時候高大全既俄羅斯方塊等級仍然都係三十幾，一時升一時跌，苦無對策……咁點算好呢？呢個時候高大全發現……

Set Map原來比無 Map更好玩同易玩！

Set Map既款式有好多，如下圖等等
 
Set Map既玩法，一開始講求「拆積木」。只要你拆得快，一開始就已經可以送個ko比對手。之後就係快快儲積木，高大全通常會空兩行比自己，以便敵人來襲時可以還擊。以下就係高大全玩到95等級既玩法。

今次挑戰100級既任務可謂非常艱難，隨時比對手打落谷底。Just like ......

→

由96級跌落95級既感覺太難受  ，睇下一星期後既高大全能唔能夠挑戰成功先！

背地鐵站名稱

week 10 wednesday
本來是有一個好想今日完成的mission，但係有D野唔記得買，所以做唔到......><
唯有睇返精選mission，最後決定背地鐵站名，唔好睇香港咁細，原來長長短短都有10條線，而今日我即場背的是自己上學放學最常乘踏的港島線和荃灣線！


首先俾大家睇睇香港地鐵線全貌：

大家落足耳力聽我背啦！

感想：
用左電話錄左N次，牌子包括LG、samsung、Nokia、sonyericsson......
但係d程式轉激都轉唔到，最後要出動錄音筆.......前前後後用左差唔多一個鐘，人都癲呀！！！


P.s:部分圖片取自網絡

讀書周

week 10 tuesday
這個星期的想做的mission只得一個：3月完結前看完一本書。
至於那本是什麼書，還未想好。事關，決定這本是什麼書的要素，是當代文學的論文題目。
筆者一直在苦惱，到底做劉以鬯的《酒徒》還是陳慧的短篇小說集，或是長篇小說《拾香紀》。
意識流寫法的《酒徒》一直以來給我很深印象，擁有它已久，不過久久未能讀完。因為讀意識流作品令我感到很傷神，好像快要瘋掉。所以往往讀幾頁就放下，然後久久未能醒來。那天卓然老師在大課上問及那書中的第一句時，很自然就叫了出來。那句句子實在很浪漫。
至於陳慧，在初中時聽過她的講座，她給我的感覺不很作家，反而像個「師奶」，談吐很文學的「師奶」。一直到高中才再接觸陳慧的作品，原來小時候什麼都看不懂。到長大後，重新再把讀過的書再讀一遍，發現如獲至寶。
陳慧筆下的香港是個小都市，小得很溫馨，特別是那些愛情短篇，有些窩心，有些撕心，有些貼心。
不過，要是以陳慧為研究對象的話，該如何是好呢？
這又是一個謎，大家或許可以提供點意見。

苦瓜新食法

Week 10, Monday

        又撐過左一個不如意既上課周，終於可以有個「暫時」訓得安心訓得夠皮既星期五晚。訓得夠自然有活力，十點幾訓醒無野做，突然好想整野食，個腦一下就諗番起上星期「不寒領導人」俾既意見——「豉汁苦瓜、苦瓜炒蛋」，一於來個「豉汁苦瓜炒蛋」！

材料：苦瓜 x1、雞蛋 x3、自家秘製豉汁適量 (憑感覺)、油鹽糖適量 (憑經驗)

第一步，苦瓜照舊灼熟切粒。

第二步，將雞蛋「發勻」。

第三步，將豆豉浸水出味 (減少咸味)，然後「顏碎」(易出味)。

 

        準備好材料，開爐ready。首先，將苦瓜同雞蛋好似菜脯煎蛋咁煎埋一齊。(個人認為蛋唔夠，搞到散既瓜粒太多)然後，將調好味既豉汁落鑊一齊炒勻，可放適量糖調味。當炒到差唔多乾身就可以了。

豉汁炒前

豉汁炒後

        成個過程用左30分鐘左右。個賣相同我預期有少少出入，不過，如果好食就得啦，我相信憑住十幾年傍左阿媽煮「食送」既經驗，點衰個味道都會有個譜。試食，掂！只係有點淡，拿拿臨入盒連隔夜飯打包番工。呢兜野送白飯好OK，配埋同事罐辣椒醫之後味道更正，上次兜齋苦瓜係捱左三十分鐘，今次個「食送」就係歎左20分鐘！估唔到我仲寶刀未老。哈哈。Mission completed

河內塔征服記 上

WEEK 9 SUNDAY
MISSION : 解決河內塔3-10層


　　自從將俄羅斯方塊玩到封頂後，我一直搵緊其他智力遊戲當替代品，今次揀既係河內塔！！
　　河內塔（Tower of Hanoi）係咩黎？根據維基既講法，河內塔起源於法國數學家Edouard Lucas所講既一個故事，傳說古印度（另一說法為河內）某神廟入面有三條細柱，其中一條柱插滿64個圓盤，只要將全部圓盤移去另一根柱度，就會有大事發生云云，不過移盤時必須遵守兩個規定：1.一次只可以移動一個圓盤；2.大盤唔可以放o係小盤上，咁列底要移幾多次先可以搬哂所有盤呢？呢條數學問題就引伸左河內塔呢個遊戲出黎啦！
　　為左方便大家理解河內塔實際係點玩，本人用File同硬卡紙山寨左個河內塔出黎，請睇以下示範：

　　由上圖可見，遊戲開始時，組成三層塔既圓盤由小至大排列o係中間位置，首先將數字最細既圓盤1搬去左面，圓盤2調去右面，再將圓盤1疊去圓盤2之上，騰出左邊空間後，移圓盤3過去左面，呢個時候作為塔底既圓盤3已經搬離原來位置，跟要做既就係將圓盤2同圓盤1搬上去圓盤3度。到左step5果陣圓盤2上面會有比佢數字細既圓盤1擋住，所以要將圓盤1移去中間空位，再放圓盤2去圓盤3度，最後放圓盤1去圓盤2,3之上，得左！簡單d黎講呢個遊戲既終極目的就係將塔原來所處既位置改變就謂之成功喇。
　　塔既移動次數有一定既規律，一層係一次，兩層三次，三層七次，四層十五次，五層三十一次……除左第一層之外，塔既移動次數會係前一層移動次數兩倍再+1，套用返Edouard Lucas既講法，每層既移動次數都可以用遞迴函數（雖然我唔知係咩黎）計到出黎既，不過本人數學太差，玩既時候都係多數靠撞，仲成日重複步驟都唔覺tim！星期四果陣o係Bonnie同學既見證下，我用左差唔多五個字既時間移八層塔，為左一雪前恥我要解決十級！不過，河內塔既層數與遊戲難度同時間成正比，以笨拙既本人為例，玩四層26秒，五層58秒，六層2分26秒，七層 6分35秒…

（原片長度為10分鐘35秒）




待續……