Mission Possible

2012年2月5日星期日

精選MISSION

‎21.日行一善(1星期)
22.親手整情人節朱古力
23.帶飯一個星期
24.和孔子像和孫中山像影相
25.上OU天台花園做早操(1星期)
‎26.每日最少讚10個人(於ou進行)(一星期)
27. (以不記名方式) 送d野比你關心既同學仔n老師
28. 一日食一條蕉/一個蘋果 (一個星期)
29. 拎唔識既ouhk學生既phone no. 10個(認識新朋友仔)
30 叫50個人每日瀏覽呢個BLOG(一個星期)

又一個失敗的MAN

Week 2 Sunday

Mission:一星期內每日唔可以洗多過$40

前排係咁睇私家醫生搞到戶口乾涸，呢個mission真係岩哂我而家既處境！

未開始時八達通有$152.6，MARK低先

除左搭車之外，我ｄ錢大部份洗左o係買零食同買衫上，只要我堅持呢個星期唔做呢兩樣野應該可以完成到任務！以防萬一我放低左張提款卡o係屋企，銀包只放兩百五十蚊。

SUN

要返工既關係點都要買外賣，早餐平D所以買定等放LUNCH食，還好平時食量唔大冇胃痛

車費：$3+$3

Bruch：$27.3

Total：$36.3

MON

是日宅o係屋企冇洗過錢

TUE

我平時返學既路線係巴士去火車站>火車去紅磡>小巴上何文田，來回一共$22.8，但只搭火車既話可慳$14.4！不過代價係著住高跟鞋行上山，右腳腳跟出血=_=

車費：$4.2+$4.2

下午茶：$20

影印：$3

TOTAL：$31.4

WED

車費：$4.2+$2.9+$3

LUNCH：$26.4

TOTAL：$36.5

THUR

車費：$4.2+$4.2

LUNCH：$15

零食：$9.6

TOTAL：$33

是日破戒買左包零食，希望用黎引誘十蚊飯開金口，點知佢死都唔出聲！

原本想同走路花佢地行街，但唔洗得錢搞到冇得去

又冇朋友啦我

FRI

車費：$4.2+$4.2

電話費：$35

LUNCH：$34

TOTAL：$77.4

比意粉香味吸引既我唔記得左我唔可以買超過$33.6既LUNCH，大意算漏左呢四毫子令我前幾日既心血付之流水，反正都失敗左就豁出去交埋月費…

星期五過後銀包得返唔夠一百蚊，八達通有五十幾

睇黎MISSION FAILED係會傳染架！

2012年2月4日星期六

背長恨歌，大檢討！

Week 2 Saturday

話說上個星期定既Mission係背長恨歌，今日就黎檢核成果！

在地鐵背詩

一開始我就將前部分既詩句抄落張紙度，趁返學放學搭車既時間黎背詩。如果每日都用呢ｄ時間黎背既話，我相信應該係背到既。但係有時背背下會恰眼訓，結果讀到喉嚨爛先可以完全記到呢26句。有時背背下會唔記得一兩句，之後又兜返轉頭背多幾十次，用左唔少時間。

「漢皇重色思傾國，禦宇多年求不得。……遂令天下父母心，不重生男重生女。」

跟住係最後呢２日，覺得唔可以再係咁死背落去。

要變通，於是上網搵記憶法。

恰眼訓

什麼圖像記憶法、７正負２原理、荒謬的聯想.................

最後我決定用「假裝理解」（諧音狂想記憶法），由第27句開始。

用諧音老作左以下既內容：

驪宮高處入青雲，(離宮go qu(pth第四聲)入青雲)

有個人離宮去左搵青雲

仙樂風飄處處聞．(先惡風飄處處聞) 風飄惡先

暖歌慢舞凝絲竹，(嫩哥孟母仍是粥) 嫩哥孟母仲係度煲緊電話粥

盡日君王看不足．(俊逸君王體不俗) 君王既body都唔錯

漁陽瞽鼓動地來，(魚羊屁股動地來) 魚同羊屁股郁起上來連地都會郁

驚破霓裳羽衣曲．(荊破偽常雨衣cook) 荊軻識破左偽常呢個人係度cook雨衣
九重城闕煙塵生，(狗蟲誠決宴陳生) 狗蟲誠意既決定係請陳生

千乘萬騎西南行．(千城曼琪細林肯) 千城同曼琪同細過林肯

翠華搖搖行復止，(娶華瑤瑤幸福止) 娶左華瑤瑤幸福就停止

西出都門百餘里．(使出度門不預你) 使出度門(絕招)唔預你

………………………………………………………………

用左邊既文字來記右邊既原文，真係好記好多，而且唔會咁快唔記得。

可惜時時間唔夠，120句既長恨歌只係背左三分一。

建議讀者理解左成首詩再用假裝理解，如果唔係，你解既係你自己既版本，而唔係原文既意思。即係完全唔理解首詩既意思，咁背左都冇用啦！

筆者真係自愧不如，上網搜尋有關長恨歌的資料，5歲小朋友都識背呢首詩！！而我用左成個禮拜既都未背好！實在慚愧！慚愧！

(部分圖片取自互聯網)

2012年2月3日星期五

捐血救人，YEAH！

大家好，我係FREELANCE既李金髮！

見到六娘較剪組玩得咁開心，我都唔執輸玩埋一份！不過個人本身無自毀傾向，所以食WASABI依D咁高段數既野就唔好搞我喇。今次我要做既任務係－－捐血！

雖然同E神、謝安琪佢地唔係好熟，不過夠歲數之後，我一路都好想捐血救人。之但係紅十字會阻止我。佢地話我唔夠重！其實好難明白，點解剩係咁死咕咕剩係睇體重。我自問身型標準，唔肥唔瘦，唔通你要一個一米五都未夠既人有一百三十磅咩？個D明明高我幾個頭都係得四十幾KG既人，紅十字會都俾佢地捐，一黎我擔心佢地生命安危，二黎我覺得對我唔公平囉。計比例既話，我肯定健康過佢地！近排又話唔夠血，又唔俾人捐！

依個世界上往往就係充滿住依D荒謬既事情，而作為一個渺小既人類，我決定隨波逐流，今次的起心肝，增肥！

對上一次發育，響我記憶入面應該都差唔多上個世紀既事。咁多年黎體重一路都突破唔到90磅，亦因為咁樣所以紅十字會D阿姐就唔肯俾我捐……距離達標，依家大概仲爭五磅左右。五磅好似唔係好多，食多幾啖應該好快達成任務啦！諗係咁諗啦……

於是我決定由今日開始要食多D！

朝早趕住出門口，剩係趕得切食左條大蕉，番到學校無耐，十一點都開始有D餓，於是一落堂即刻落學校CANTEEN買左個焗豬扒飯。焗豬扒飯呀！我人生中從來未試過食完成個焗豬扒飯。今日食到一半已經飽飽地，平時都已經停晒手，但係今日一定要食晒佢。但係黎到依個地步其實都唔係好得……尋日俾我地糟質完既十蚊飯就響隔離：「食啦！加油啦！」真係風水輪流轉……響隔離食花生真係過癮好多。食到剩番三分一既時候，其實已經有反胃既感覺，但係我都堅持埋落去，最後竟然真係食得晒，但係跟住真係飽足幾粒鐘。話就話後來好似落左少少格咁，其實都係岩岩入梗條腸架咋。仲要跟手4點幾5點去食下午茶啪多件蛋撻，即刻又頂番上去喉嚨……直到夜晚十點幾搭西鐵番屋企，架西鐵FING下FING下咁，都仲想嘔番晏晝食過既野出黎。點知一番到屋企，阿媽煲落左蕃薯糖水，一臉誠懇咁拎左成大湯碗出黎俾我宵夜，今鋪真係世上只有媽媽好喇。

諗落，食野食到咁，都幾折墮。不過，為左捐血救人，我一定要堅持落去！欲知結果如何，請繼續留意MISSION POSSIBLE啦！

鬥唔講野

WEEK 2 Friday

MISSION POSSIBLE：一日唔講野

人總唔會BI LI BA LA講個唔停，需要有靜落黎既時候。
遇正喉嚨唔舒服，做呢個MISSION就最適合不過！

由2月2日，朝早10點一起身，就正式開始唔講野MISSION。

番到學校，班友仔知道我做呢個MISSION，搞搞震！

平時多數問YES OR NO ，宜家唔單止係YES OR NO，仲「好關心我」。
我當然要堅守MISSION，將個嘴有咁密、封到咁密啦！點可以咁快動搖！

好景不常，呢種關心轉眼間化為涼薄對待！！！

野又無得食、計又無得傾，好淒涼。

朋友同我講野，我只可以指手畫腳做手勢。

有時候都唔知做緊咩動作……
佢地又唔知我想表達乜野，有D焦急、有D燥……

嗱！一上堂未又係靜晒。

所以自願然地唔講野比起被迫地唔講野辛苦好多好多好多。

唔夠一陣，又嘗試「打開我把口」。
方法簡直係無所不用其極！！！

叉鼻哥窿、食物引誘……

終於……係下晝 3：42，開聲講野。

死係導修堂，宣告挑戰失敗。

最後，堅持左 5小時42分鐘

MISSION FAIL***

不過，開聲之後有野食，都唔錯呀！！！

今次得著：
說話應該係最直接了當既溝通方法，但係對方往往係理解既過程出現偏差。

所以有時候會有牛頭不對馬嘴既情況出現，又或者根本唔知對方講咩！
咁既情況，會令人好鬱悶~
做呢個MISSION果陣，深深地體會到呢種鬱悶心情……

有時候，屋企無人，真係可以成日都唔講野。
有D人會自己同自己講野，例如同公仔講野、口UP UP咁……
細個果時都試過同公仔講野。

但係望住佢，又無表情、又無反應，真係講唔落去，於是放棄。

不過，有時靜落黎，俾時間自己，同自己溝通。
都係有益身心既事！

2012年2月2日星期四

Mission Possible:15分鐘內食晒成支wasabi

Week 2--- Thursday

我鐘意睇獎門人的節目，特別鐘意睇「辣辣壽司」邊個食。點解？因為表面看似一件令人口水直流既壽司，原來入面係充滿著如魔鬼般既wasabi！當然係見者開心，食者流淚。

我一直都好佩服別人食好多wasabi既時候，表現得無痛苦而且悠然自得既樣子。

就好似電影Wasabi中 Hubert食wasabi既一幕

睇下佢食到幾滋味，真係完全將wasabi給予人這種刺激和痛苦既感覺完全洗掉！

因此，我今次既任務就係希望可以學Hubert食wasabi食得悠然自得既樣子，成功與否仍然都係未知之數，好緊張啊！

測試當日：2月1日

一支43g 既wasabi，Jusco售$11.9，平過木又個支 @w@，食落去既時候仲要有山葵顆粒，幾有咀嚼感！

今日約埋三五知己係天台即場上演食wasabi，事先都以為應該不太難，因為我覺得只要將d wasabi放係舌頭中間部分，接觸唔到味蕾部分，刺鼻既感覺應該可以減少。測試開始…

當我落力地吸wasabi個時，滿口都係好似麥片超黏口既感覺…我真係好嘔心，wasabi未擴散既時候我已經想嘔。當然，想嘔就自然會分泌唾液，糟糕！連同wasabi一齊擴散滿口內而且張住喉嚨。極度刺鼻、極度刺激！>>>><<<<<我真係要舉白旗…落入食道時候，就好似一股暖流直逼胃臟，開始火燒胃啦！> <

飲水都唔得，最後食奶糖、食雪糕、飲奶茶，無事lu~~(記住我只係啜左一啖)= =

只係啜左一啖，見到仲有咁大支…Mission Failed！

由於我真係好想好似Hubert咁利害，於是忽發奇想，拍段片先~~

我全身充滿力量啦!!~

再黎！走路花爆笑演出！

附送毒氣雙子蝦碌鏡~~~

食用山葵的好處

抗癌效果：山葵含有的peroxidase酵素，可促進對於進入人體的異物進行解毒，也可以抑制染色體數目異常，對於致癌物質或輻射線所誘發造成的突變具有保護的效果，在許多的實驗中已經被證實。

腦細胞再生：山葵所含的辛辣成分有助於促進大腦細胞再生、改善記憶力以及學習能力。

預防血栓：在山葵特有香味的主成分影響下，可抑制血液中血小板的凝聚，因為可強力防止血液凝固，可防止動脈硬化，使血液順暢流動。

強力殺菌：山葵具有強力的殺菌效果，可預防食物中毒、金黃色葡萄球菌。

預防骨質疏鬆症：經由實驗發現，山葵可增進骨質含量，預防骨質疏鬆症發生。

增進食慾：山葵的顏色及辛辣味不止可增進食慾，更促進腸胃的消化及吸收。

以上資料來源：http://www.wasabi.com.tw/know.html

哇！咁多好處，大家都齊齊食多d食多d食多d ~~

　是次wasabi挑戰，我唔洗10秒就......被ko，你今日試左未？！

2012年2月1日星期三

校服日

Week 2 Wednesday
以前中學有一條辯論題最中意問，你認為中學生應否穿校服？
當時我己經支持中學生應該穿校服，因為唔使諗聽日穿乜，已經煩少好多野，又唔使煩驚同人撞衫，慳返唔少，穿校服咁多好處，都唔知點解d人要反對？

anyways，我自己就中意穿啦，所以今次約左十蚊飯、撈水草、子母奶一齊做穿校服MISSION，加上自己好中意套校服，兩年幾都無穿過，今次有得穿，都真係既興奮又開心，哈哈~

出到街，都無乜奇異的眼光，最多有人望下對converse，一切大致正常，行到培正道，見到十蚊飯，佢穿著一套類似真光旗袍的校服，不過顏色較深，也是穿converse，見到佢好開心，因為有人壯膽都唔同d。

上都到七樓，開始有人會望下，我地啦啦聲去到課室門口，第一堂是當代文學導修，又唔敢入去，企左3分鐘左右，終於鼓起勇氣，打開門，行入去，好彩有十蚊飯傍住，唯有當同學睇我唔到，睇我唔到。雖然俾人用異光望住，周身唔聚財，但係耐左都無乜感覺，反正俾人望兩眼又唔使死，哈哈，無幾耐，撈水草都成副武裝返到，我地三個就變左中學生大聯盟。